Þann 30. júní átti ég fund með Páli S. Brynjarssyni, framkvæmdastjóra SSV, og Lindu Guðmundsdóttur, verkefnastjóra DalaAuðs, þar sem farið var yfir stöðuna á verkefninu DalaAuður. Verkefnið hefur verið afar mikilvægt fyrir Dalabyggð, stuðlað að nýsköpun, atvinnuþróun og aukinni verðmætasköpun, auk þess að efla samstarf og þátttöku íbúa í þróun samfélagsins. Nú fer verkefninu senn að ljúka og þarf að ákveða hvernig tryggja megi áframhaldandi vinnu á grunni þess árangurs sem náðst hefur í gegnum þetta mikilvæga verkefni.

Þann 1. júlí undirritaði ég ráðningarsamning við Einar Björn Þorgrímsson sem ráðinn hefur verið lýðheilsufulltrúi Dalabyggðar. Það er ánægjulegt að fá Einar til liðs við sveitarfélagið og hlakka ég til samstarfsins á komandi misserum. Hann tekur við starfinu af Ísaki Sigfússyni sem heldur fljótlega til annarra starfa. Ísak hefur staðið sig afar vel á liðnu ári og hélt meðal annars utan um uppbyggingu íþróttahússins ásamt fleirum. Hann hefur átt stóran þátt í þeirri uppbyggingu sem átt hefur sér stað síðustu mánuði og óska ég honum velfarnaðar í komandi verkefnum.

Daginn eftir voru fyrstu fundir nýrrar fræðslunefndar og félagsmálanefndar haldnir. Á fundunum var farið yfir helstu verkefni fram undan og lagður grunnur að góðu samstarfi nefndarfólks á kjörtímabilinu.

Hópur vaskra krakka úr vinnuskólanum kíkti í heimsókn í stjórnsýsluhúsið. Þar fengu þau heitt kakó og rjómatertu og gafst tækifæri til að spjalla um þau verkefni sem þau hafa sinnt síðustu vikurnar.

Helgina 3.–5. júlí fór fram bæjarhátíðin Heim í Búðardal. Mikill fjöldi gesta lagði leið sína í sveitarfélagið og dagskráin var bæði fjölbreytt og vel sótt. Hátíðin er mikilvægur vettvangur fyrir íbúa og gesti til að koma saman, njóta samveru og kynna sér það sem Dalabyggð hefur upp á að bjóða. Við það tilefni voru einnig frumsýnd glæsileg kynningarmyndbönd á Dalabyggð sem hafa verið í vinnslu síðustu mánuði en áhersla þeirra er á daglegt líf íbúa í sveitarfélaginu. Metaðsókn var í sundlaugina í Búðardal þá helgina en um húsið fóru vel á fimmta hundrað gestir.

Dalabyggð vinnur nú að því að efla og styrkja þjónustu við börn og fjölskyldur. Í því samhengi hefur verið ákveðið að skoða inngöngu í Barnaverndarþjónustu Vesturlands, sem er samstarfsvettvangur flestra sveitarfélaga á Vesturlandi um rekstur barnaverndarþjónustu. Af því tilefni fengum við góða gesti í heimsókn frá Borgarbyggð, þau Hlöðver Inga Gunnarsson, sviðsstjóra fjölskyldusviðs, og Erlu Björgu Kristjánsdóttur, félagsmálastjóra. Á fundinum voru lögð drög að næstu skrefum vegna aðildar Dalabyggðar að samstarfinu.

Þann 3. júlí var ánægjuleg stund í Dalabúð þegar nýr flygill var formlega afhentur og tekinn í notkun. Verkefnið „Nýr flygill í Dalabúð“ hefur verið í vinnslu undanfarna mánuði og var sett af stað í tilefni af 50 ára afmæli tónlistarskólans í Dölunum, sem nú er hluti af Auðarskóla. Flygillinn var vígður á glæsilegum tónleikum þar sem fram komu listamenn á heimsmælikvarða; Hallveig Rúnarsdóttir, Ólafur Rúnarsson, Hanna Dóra Sturludóttir, Alvilda Elmarsdóttir og Matthildur Anna Gísladóttir. Frumkvæði að verkefninu áttu Sigurbjörg Kristínardóttir, fyrrverandi tónlistarkennari og organisti, ásamt þeim Kristínu G. Ólafsdóttur og Ólafi Rúnarssyni. Með öflugum stuðningi einstaklinga, fyrirtækja og annarra velunnara tókst að fjármagna kaup á þessu glæsilega hljóðfæri sem mun án efa nýtast menningarlífi sveitarfélagsins um ókomin ár.

Þann 7. júlí fór fram aðalfundur Dalagistingar þar sem ný stjórn tók formlega til starfa. Fráfarandi stjórn mun þó koma saman síðar í sumar á framhaldsaðalfundi þar sem ársreikningur félagsins verður endanlega afgreiddur, en ekki lágu fyrir allar forsendur til að hægt væri að ganga frá uppgjöri síðasta árs.

Sama dag fundaði byggðarráð Dalabyggðar. Á fundinum var farið yfir ýmis mál, meðal annars úthlutun lóða, staðfestingu skipulagsákvarðana umhverfis- og skipulagsnefndar, framtíðarsýn varðandi rekstur barnaverndarþjónustu og fleira. Eitt þeirra mála sem nokkuð var rætt er mikið hagsmunamál fyrir sveitarfélagið, en það er ákvörðun ríkisvaldsins um að breyta einhliða reglugerð um meðferð mála barna með fjölþættar stuðningsþarfir með þeim hætti að mun fleiri börn falli utan fjárhagslegrar ábyrgðar ríkisins. Getur þetta haft töluverð áhrif á rekstur sveitarfélaga og því mikilvægt að fylgjast grannt með framvindunni.

Á miðvikudeginum átti ég spjall við Sigurð Boga blaðamann hjá Morgunblaðinu vegna greinar sem hann hyggst birta á næstu dögum. Þar var farið um víðan völl enda er Sigurður einstaklega laginn við að draga saman það sem brennur á fólki.

Ég þáði kaffisopa hjá eigendum Dalahótels að Laugum í Sælingsdal, þeim Karli Örvarssyni og Halldóru Árnadóttur. Það var ánægjulegt að sjá hversu mikið uppbyggingarstarf hefur átt sér stað á Laugum en þau reka þar hótelið af miklum myndarskap.

Síðastliðinn laugardag var svo haldin Sturluhátíð á Staðarhóli og Laugum í Sælingsdal. Þar var margt um manninn, dagskráin afar áhugaverð og kaffihlaðborðið einstaklega veglegt. Einnig voru tónlistaratriðin sérlega vel heppnuð en þar fluttu nokkur lög systkinin og Dalamennirnir Soffía Meldal Kristjánsdóttir og Benóní Meldal Kristjánsson. Sama dag fór einnig fram aðalfundur Sturlufélagsins, en Einar K. Guðfinnsson er formaður stjórnar og stýrir starfinu af miklum metnaði.

Að lokum er vert að nefna það mikilvæga hlutverk sem sjálfboðaliðar og einstaklingar gegna í samfélagi eins og okkar. Margir þeirra viðburða sem ég hef nefnt, svo sem afhending flygilsins, bæjarhátíðin Heim í Búðardal og Sturluhátíð, yrðu einfaldlega ekki að veruleika nema fyrir frumkvæði, eljusemi og óeigingjarnt framlag þeirra sem koma að undirbúningi og framkvæmd. Ég vil því færa öllum þeim sem hafa lagt hönd á plóg undanfarna daga mínar bestu þakkir fyrir framlag sitt.

Að lokum minni ég á sumarlokun stjórnsýsluhússins sem verður frá 20. júlí til og með 4. ágúst

Þessi frétt Dagbók sveitarstjóra 29. júní – 12. júlí 2026 sást fyrst á Dalabyggð.

Bæjarhátíðin Heim í Búðardal fór fram á sama tíma og var greinilegt að hátíðargestir nýttu sér sundlaugina og aðra aðstöðu íþróttamiðstöðvarinnar á milli viðburða. Gestir nutu veðurblíðunar og einstaks útsýnis frá sundlaugarsvæðinu á meðan börnin léku sér í sundlaugahoppukastala.

Þessi mikla aðsókn er afar ánægjuleg og undirstrikar mikilvægi nýju íþróttamiðstöðvarinnar sem viðbót við afþreyingar- og íþróttaaðstöðu í sveitarfélaginu. Á fáum mánuðum hefur hún orðið vinsæll staður fyrir hreyfingu, heilsueflingu og samveru.

Þessi frétt Metaðsókn í Íþróttamiðstöð Dalabyggðar helgina 3. – 5. júlí sást fyrst á Dalabyggð.

Viðmunardagur kjörskrár segir til um hvar kjósendur eru skráðir á kjörskrá. Ef kjósandi flytur lögheimili sitt eftir þann tíma er hann enn á kjörskrá miðað við fyrra heimilisfang. Tilkynning um nýtt lögheimili þarf að hafa borist Þjóðskrá fyrir klukkan 12 á hádegi 22. júlí.

Kjörskrá er samskonar og við alþingiskosningar og forsetakjör. Á kjörskrá eru íslenskir ríkisborgarar sem náð hafa 18 ára aldri á kjördag og eiga lögheimili á Íslandi.

Íslenskir ríkisborgarar sem hafa átt lögheimili á Íslandi hafa kosningarétt í 16 ár frá því þeir flytja af landinu. Eftir þann tíma þarf viðkomandi að sækja um að vera settur aftur á kjörskrá fyrir 1. desember ár hvert. Hafi ekki verið sótt um fyrir 1. desember 2025 getur viðkomandi ekki kosið við þjóðaratkvæðagreiðslu í lok ágúst.

Erlendir ríkisborgarar búsettir á Íslandi eiga ekki kosningarrétt við þjóðaratkvæðagreiðslu og geta því ekki kosið.

Kynningarvefur landskjörstjórnar um þjóðaratkvæðagreiðslu 29. ágúst er www.thjodaratkvaedi.is/

Upplýsingavefur landskjörstjórnar um framkvæmd þjóðaratkvæðagreiðslu 29. ágúst er https://island.is/v/thjodaratkvaedagreidsla-2026/fyrir-kjosendur-thjodaratkvaedagreidsla

Yfirkjörstjórn Dalabyggðar

Þessi frétt Þjóðaratkvæðagreiðsla 2026 – Viðmiðunardagur kjörskrár sást fyrst á Dalabyggð.

Innan marka Dalabyggðar hafa starfað sveitarfélög undir 13 heitum í 22 útfærslum vegna 8 breytinga á sveitarfélagsmörkum og stofnun nýrra við klofning eða sameiningu sveitarfélaga. Sveitarfélögin eru Skógarstrandarhreppur, Hörðudalshreppur, Miðdalahreppur, Haukadalshreppur, Laxárdalshreppur, Hvammshreppur, Fellsstrandarhreppur, Skarðsstrandarhreppur, Saurbæjarhreppur, Klofningshreppur, Skarðshreppur, Suðurdalahreppur og Dalabyggð.

Á heimasíðu Héraðsskjalasafns Dalasýslu er stutt samantekt um sveitarfélög á starfsvæði Dalabyggðar.

Þessi frétt Dalabyggð – sameining 10. júní 2006 sást fyrst á Dalabyggð.

Ingibjörg Þóranna Steinudóttir 248 atkvæði

Guðbrandur Tumi Gíslason 238 atkvæði

Ingveldur Guðmundsdóttir 228 atkvæði

Skjöldur Orri Skjaldarson 222 atkvæði

Guðlaug Kristinsdóttir 192 atkvæði

Sindri Geir Sigurðsson 142 atkvæði

Bjarnheiður Jóhannsdóttir 107 atkvæði

Varamenn í sveitarstjórn

1. Valdís Gunnarsdóttir 102 atkvæði

2. Guðrún Erna Magnúsdóttir 121 atkvæði

3. Þórunn Elva Þórðardóttir 96 atkvæði

4. Jón Egill Jóhannsson 84 atkvæði

5. Guðmundur Sveinn Bæringsson 79 atkvæði

6. Sigurvin Þórður Viðarsson 66 atkvæði

7. Sigurður Bjarni Gilbertsson 51 atkvæði

Á kjörskrá voru 534 kjósendur, 281 karlar og 253 konur. Alls greiddu 293 atkvæði (54,87 % kjörsókn), 145 karlar og 148 konur.

Auðir seðlar voru 4 og engir ógildir.

Yfirkjörstjórn Dalabyggðar

Þessi frétt Sveitarstjórnarkosningar 2026 – Úrslit sást fyrst á Dalabyggð.

Enginn framboðslisti var lagður fyrir kjörstjórn Dalabyggðar innan lögbundins frests og verða því óbundnar kosningar (persónukjör) í sveitarstjórnarkosningunum 16. maí 2026.

Allir kjósendur sveitarfélagins eru því í kjöri, nema þeir sem löglega eru undanþegnir skyldu til að taka kjöri og hafa fyrirfram skorast undan því.

Þeir sem hafa að skorast undan kjöri samkvæmt 49. gr. kosningalaga nr. 112/2021 eru Eyjólfur Ingvi Bjarnason í Ásgarði, Halla Sigríður Steinólfsdóttir í Ytri-Fagradal, Skúli Hreinn Guðbjörnsson í Miðskógi og Þuríður Jóney Sigurðardóttir á Sunnubraut 3b. Atkvæði greidd þessum einstaklingum verða úrskurðuð sem ógild.

Þeim sem er kjörgengur, heill og hraustur og yngri en 65 ára er skylt að taka kjöri í sveitarstjórn skv. 5. mgr. 49. gr. kosningalaga nr. 112/2021.

Kjörfundur

Kjörfundur verður laugardaginn 16. maí kl. 10:00 – 19:00 í Dalabúð.

Óski kjörstjórn þess, ber kjósanda að framvísa persónuskilríkum á kjörstað.

Skrifa skal læsilega nafn og heimili 7 aðalmanna og 7 varamanna. Auðar línur á kjörseðli ógilda ekki önnur greidd atkvæði. Þannig að t.d. atkvæðaseðill án varamanna telst gilt atkvæði og einnig þó aðeins sé eitt nafn skrifað á seðilinn.

Öll atkvæði aðalmanna eru jafnvæg og skiptir því ekki hver röð þeirra er á kjörseðlinum. Röð varamanna skiptir aftur á móti máli og eru þau númeruð. Hvert sæti varamanns er talið sérstaklega og teljast með atkvæði greidd viðkomandi sem aðalmaður og í fyrri sæti sem varamaður.

Atkvæði telst gilt þó sleppt sé fornafni, eftirnafni eða heimilisfangi ef enginn vafi er á við hvern er átt.

Aðstoð á kjörstað

Kjósandi á rétt til aðstoðar við atkvæðagreiðsluna án skýringa.

Aðstoð skal veitt af þeim úr kjörstjórn sem kjósandi tilnefnir eða aðstoðarmanni sem fylgir kjósanda á kjörstað. Aðstoðarmanni kjósanda er óheimilt að gerast aðstoðarmaður fleiri en þriggja kjósenda við sömu kosningar.

Talning atkvæða

Talning atkvæða fer fram í stjórnsýsluhúsinu (fundarsal á annarri hæð) og hefst um kl. 20:00 eða um hálftíma frá að atkvæðagreiðslu og frágangi lýkur.

Kjörskrá

Viðmiðunardagur kjörskrár var miðvikudaginn 8. apríl. Á kjörskrá í Dalabyggð eru alls 534, karlar 281 og konur 253.

Kjörskrá fyrir Dalabyggð vegna sveitarstjórnarkosninganna liggur frammi til kjördags á opnunartíma skrifstofu Dalabyggðar, Miðbraut 11 í Búðardal.

Á kjörskrá eru allir íslenskir og norrænir ríkisborgarar sem náð hafa 18 ára aldri þegar kosning fer fram og eiga lögheimili í sveitarfélaginu. Erlendir ríkisborgarar sem hafa átt samfellda búsetu á Íslandi í að minnsta kosti þrjú ár fyrir lok kjörfundar og eiga lögheimili í sveitarfélaginu. Jafnframt námsmenn á Norðurlöndum sem hafa sótt um að vera teknir á kjörskrá.

Athugasemdum og kærum við kjörskrá skal beint til Þjóðskrár Íslands sem tekur þær til meðferðar.

Upplýsingar

Upplýsingar um flest er lýtur að sveitarstjórnarkosningunum er að finna á kosningavef Landskjörstjórnar og á vef Dalabyggðar.

Annað

Af gefnu tilefni skal tekið fram að gervigreindin getur gefið rangar upplýsingar um óbundnar kosningar og ekki mælt þeirri aðferð við að afla sér upplýsinga. Frekar er mælt með að afla sér upplýsinga á heimasíðu Landskjörstjórnar, hér á þessari síðu eða hafa samband við kjörstjórnarfulltrúa með spurningar.

Yfirkjörstjórn Dalabyggðar

Þessi frétt Kjörfundur vegna sveitarstjórnarkosninga sást fyrst á Dalabyggð.

Kynningar á frambjóðendum

Þessi frétt Kynningar frambjóðenda sást fyrst á Dalabyggð.

Kosið verður á afgreiðslu sýslumanns í stjórnsýsluhúsinu í Búðardal eftirtalda daga

• þriðjudaginn 21. apríl kl. 9:00-15:00.
• þriðjudaginn 28 apríl kl. 9:00-15:00.
• miðvikudaginn 29. apríl kl. 9:00-15:00
• fimmtudaginn 30. apríl kl. 9:00-15:00.
• þriðjudaginn 5. maí kl. 9:00-15:00.

Frá og með 6. maí fram að kosningum fer utankjörfundaratkvæðagreiðsla fram á skrifstofu Dalabyggðar alla virka daga á opnunartíma skrifstofunnar.

Þessi frétt Utankjörfundaratkvæðagreiðsla sást fyrst á Dalabyggð.

Á Héraðsbókasafni Dalasýslu eru ljóðabækur kvenna áberandi og hvatt til ljóðalesturs.

Einar Kristjánsson fyrsti héraðsskjalavörður Héraðsskjalasafns Dalasýslu átti þó nokkurt vísnasafn og er það varðveitt á Héraðsskjalasafni Dalasýslu. Síðan hefur bæst við kveðskapur á safnið og í ár hafa verið tvær afhendingar eingöngu með kveðskap.

Sýningin er ágætis tilefni til að minna á að Héraðsskjalasafn Dalasýslu tekur við hvers konar kveðskap sem og öðrum einkaskjölum sem tengjast Dölunum og nágrenni.

Kvæðið á myndinni er elsti og eini kveðskapurinn á sýningunni eftir ónafngreinda konu. Það er að finna í Króksfjarðarbók Sturlungu og sögð ort af „kerlingu einni í Tungu“.

Þessi frétt Dalakonur kveða sást fyrst á Dalabyggð.

Miðað er við skráningu lögheimilis og ríkisfangs í þjóðskrá 32 dögum fyrir kjördag, sem var 8. apríl síðastliðinn.

Á kjörskrá eru 534 kjósendur, 281 karl (52,6%) og 253 konur (47,4%).

Þá geta kjósendur kannað hvort og hvar þeir eru á kjörskrá á heimasíðu Þjóðskrár. Kosið verður í Dalabúð.

Ítarlegri upplýsingar um sveitarstjórnarkosningar er að finna á heimasíðu Landskjörstjórnar.

Yfirkjörstjórn Dalabyggðar

Þessi frétt Kjörskrá Dalabyggðar sást fyrst á Dalabyggð.

Allir kjósendur sveitarfélagins eru í kjöri, nema þeir sem löglega eru undanþegnir skyldu til að taka kjöri og hafa fyrirfram skorast undan því.

Þeir sem hafa að skorast undan kjöri samkvæmt 49. gr. kosningalaga nr. 112/2021 eru

Eyjólfur Ingvi Bjarnason, Ásgarði

Halla Sigríður Steinólfsdóttir, Ytri-Fagradal

Skúli Hreinn Guðbjörnsson, Miðskógi

Þuríður Jóney Sigurðardóttir, Sunnubraut 3b

Kjörfundur verður laugardaginn 16. maí kl. 10:00 – 19:00 í Dalabúð og verður nánar auglýstur síðar.

Utankjörfundaratkvæðagreiðsla hefst 17. apríl 2026 hjá sýslumönnum og í sumum sveitarfélögum.

Á kjörskrá eru 534, karlar 281 og konur 253.

Upplýsingar um flest er lýtur að kosningum er að finna á kosningavef landskjörstjórnar, www.kosning.is.

Yfirkjörstjórn Dalabyggðar

Þessi frétt Sveitarstjórnarkosningar 2026 sást fyrst á Dalabyggð.

Bjarni kemur til með að segja í máli og myndum frá verkefni um kindagötur/fjárstíga sem hann hefur unnið að um nokkurt skeið með hjálp heimildarmanna víða um land. Þar verða þessar merku menningarminjar sauðfjárræktar skoðaðar frá ýmsum sjónarhornum.

Fjárgötur geta verið eldfornar, en á hverju ári viðheldur sauðkindin götunum og myndar nýjar eftir þörfum.

Sögustundin er í boði Byggðasafns Dalamanna í samstarfi við Félag sauðfjárbænda í Dalasýslu.

Allir áhugasamir eru velkomnir, ókeypis og kaffi á könnunni.

Þessi frétt Ærnar renna eina slóð sást fyrst á Dalabyggð.