Ég fór ásamt Kristjáni verkefnastjóra hjá Dalabyggð í heimsókn í Brekkuskóg rétt ofan við Búðardal. Þar tók Jakob Kristjánsson, formaður Skógræktarfélags Dalasýslu, vel á móti okkur og sýndi okkur þá uppbyggingu sem félagið hefur staðið fyrir ásamt öflugum hópi sjálfboðaliða á undanförnum árum. Það var virkilega ánægjulegt að sjá hversu mikið hefur áunnist með samstilltu átaki og óeigingjörnu starfi fólks sem leggur sitt af mörkum til að efla útivistaraðstöðu og bæta umhverfið til hagsbóta fyrir íbúa og gesti. Nú stendur til að leggja göngustíg frá Búðardal upp í skóginn, þannig hægt verður að komast greiðlega á milli. Brekkuskógur er sannkölluð perla sem ber vitni um hvað hægt er að gera þegar kraftur samfélagsins sameinast um sameiginlegt verkefni.

Á fallegum haustmorgni heimsótti ég hjúkrunarheimilið Silfurtún. Þar heilsaði ég upp á starfsfólk og fór yfir starfsemina með deildarstjóranum Kristínu sem tók vel á móti mér. Jafnframt gafst tækifæri til að skoða húsnæðið og þær framkvæmdir sem sveitarfélagið hefur staðið fyrir í sumar en á síðustu mánuðum hefur hluti aðstöðunnar fengið uppliftingu. Það er mikilvægt að hlúa vel að þeirri aðstöðu sem við búum yfir og tryggja að bæði íbúar og starfsfólk njóti sem bestra aðstæðna til búsetu og starfa. Silfurtún er mikilvæg stofnun fyrir sveitarfélagið bæði sem vinnustaður og til að tryggja þjónustu fyrir íbúa á efri árum.

Framkvæmdastjórn DalaAuðs kom saman til fundar þar sem farið var yfir stöðu verkefnisins og næstu skref. Ljóst er að verkefnið nálgast lok sín í núverandi mynd og mun formlega ljúka um næstu áramót. Á næstunni verður haldinn íbúafundur þar sem farið verður yfir stöðu verkefnisins, árangur undanfarinna ára og rætt hvernig best verði tryggt að sá kraftur og sú þekking sem skapast hefur glatist ekki. Markmiðið er að byggja áfram á þeim góða grunni sem lagður hefur verið og þróa nýja verkefnaáætlun fyrir samfélagið. Samtök sveitarfélaga á Vesturlandi munu áfram vinna með Dalabyggð að eftirfylgni verkefnisins. Mikilvægt er að tryggja að árangursrík verkefni haldi áfram að þróast og að sókn í styrki, meðal annars úr Uppbyggingarsjóði Vesturlands og öðrum þróunarsjóðum, haldi áfram af fullum krafti.

Ég kom við í kaffibolla hjá fyrirsvarsmönnum hjúkrunarheimilisins Fellsenda. Þar tók Þóra hjúkrunarforstjóri ásamt starfsfólki vel á móti mér og áttum við mjög gott spjall um daglegt starf og rekstur heimilisins. Einnig heilsaði ég upp á heimilisköttinn Nonna sem mætti vinalegur á móti mér, alsæll og í góðu yfirlæti hjá heimilismönnum. Fellsendi gegnir mikilvægu hlutverki í samfélaginu okkar en þar eru tæplega 30 heimilismenn og um 40 störf í misjöfnu starfshlutfalli. Það skiptir máli að eiga reguleg og góð samskipti við fyrirsvarssmenn til að tryggja grunn að áframhaldandi góðu samstarfi.

Sveitarstjórnarfulltrúar, sveitarstjóri og starfsmenn Dalabyggðar áttu nýverið samráðsfund með svæðisstjóra og stjórnendum Vegagerðarinnar á Vestursvæði. Fundurinn var haldinn að frumkvæði sveitarstjórnar. M.a. staðfestu fulltrúar Vegargerðarinnar að fara eigi í útboð, sem fer vonandi fram síðar í þessum mánuði á Vestfjarðarvegi frá Erpstöðum að Haukadalsá. Einnig á að fara í annan fjölfarin kafla á Vestfjarðarvegi um Saurbæ en munu framkvæmdir á þeim hluta hefjast á þessu ári og ljúka árið 2027. Þá var staðan á Skógarstrandavegi rædd og allir sammála um að það sé mikið hagsmunamál að koma slitlagi á þá leið enda er gert ráð fyrir þeirri framkvæmd inni á núgildandi samgönguáætlun. Ákveðið var að stofna samráðshóp þar sem bæði eiga sæti fulltrúar frá Vegagerðinni og Dalabyggð til að vinna umferðaröryggisáætlun fyrir sveitarfélagið og eiga samráð um þau sameiginlegu uppbyggingarverkefni sem eru framundan.

Sveitarstjórn kom saman og hélt sinn fyrsta vinnufund vegna gerðar fjárhagsáætlunar fyrir árið 2027. Farið var ítarlega yfir stöðu fjármála sveitarfélagsins, framkvæmdir, rekstur og tækifæri. Jafnframt voru lagðar línur um forsendur áætlunargerðarinnar og ákveðið hvaða lykiltölur og viðmið skuli liggja til grundvallar vinnunni.  Fundurinn var afar gagnlegur og markaði mikilvægt upphaf að fjárhagsáætlunarvinnu komandi mánaða. Áhersla var lögð á að tryggja ábyrga fjármálastjórn, skapa svigrúm til nauðsynlegra framkvæmda og viðhalda áfram öflugri þjónustu við íbúa sveitarfélagsins.

Ég kíkti í heimsókn til hjónanna Þórunnar Ólafsdóttur og Haralds Guðjónssonar sem hafa komið á fót nýsköpunarfyrirtækinu Dalahvítlauk á Neðri-Brekku. Þau hafa um árabil ræktað íslenskan hvítlauk með sjálfbærum aðferðum og byggt upp öfluga starfsemi sem hefur vakið verðskuldaða athygli. Auk fersks hvítlauks hafa þau þróað ýmsar hliðarafurðir, meðal annars hvítlaukssalt sem hefur notið mikilla vinsælda. Það var einstaklega fróðlegt að ganga með þeim um ræktunarsvæðið og fá innsýn í ræktunina, áskoranirnar og tækifærin sem felast í þessari spennandi matvælaframleiðslu.

Það er vart hægt að aka um sveitina án þess að koma við í söluskúrnum við Ásgarð. Þar má finna fjölbreytt úrval af vörum beint frá býli, meðal annars ferskt grænmeti, kjöt, ís og ýmsar aðrar afurðir úr héraði. Söluskúrinn er frábært dæmi um hvernig bein sala frá framleiðanda til neytanda skapar bæði verðmæti og aukna tengingu við uppruna matvælanna. Ég mæli eindregið með heimsókn fyrir alla sem eiga leið um svæðið. Og ef þið eigið ekki leið um, þá er vel þess virði að gera sér sérstaka ferð til að nálgast nýtt og ferskt hráefni beint frá framleiðendum.

Baldur Þórir kom til mín á fund þar sem við ræddum meðal annars aðstöðuna niðri við bryggjuna og þau tækifæri sem þar kunna að felast til framtíðar. Baldur sagði mér frá starfsemi Hvammsskeljar, sem hefur unnið að ræktun bláskeljar í Hvammsfirði og Breiðafirði. Starfsemin byggir á sjálfbærri nýtingu hreins sjávar og þeirra einstöku náttúruskilyrða sem Breiðafjörður hefur upp á að bjóða. Skelrækt er áhugaverð atvinnugrein sem getur skapað ný verðmæti í sveitarfélaginu, eflt matvælaframleiðslu og styrkt enn frekar fjölbreytni atvinnulífsins. Það var fróðlegt að fá innsýn í verkefnið og hlakka ég til að fara í heimsókn til þeirra við tækifæri.

Réttað var víða um sveitarfélagið síðustu helgi og það var greinilegt að ákveðin eftirvænting lá í loftinu. Ég fór ásamt tveimur sonum mínum, tengdadóttur, eiginmanni og cavalier-tíkinni minni Bríeti í tvær réttir, Gillastaðarétt og Fellsendarétt. Víða var margt um manninn og sauðféð og stemningin létt, hlý og skemmtileg. Það sem stóð þó sérstaklega upp úr var réttarkaffið í Fellsendarétt þar sem Kvenfélagið Fjóla sá um kaffiveitingar í notalegum réttarskúr á svæðinu. Skúrinn er einstaklega huggulega innréttaður og þar myndast hlýlegt andrúmsloft yfir kaffibolla og góðum kræsingum. Það var sannkallað veisluborð á boðstólum og gaman að sjá hversu vel kvenfélagið heldur utan um þessa mikilvægu hefð sem er órjúfanlegur hluti af réttarstemningunni. Takk kærlega fyrir okkur.

Eitt af því sem gerir réttirnar líka svo skemmtilegar er að þar gefst öllum handverksunnendum tækifæri til að virða fyrir sér glæsilegar lopapeysur í öllum mögulegum litum og mynstrum. Réttirnar eru þannig sannkölluð sýning á íslenskri lopapeysuhefð þar sem margar af fallegustu peysum landsins koma saman á einum stað. Hérna er Inga Oddviti Dalabyggðar í Skerðingsstaðarétt þar sem hún skartar fallegri peysu sem prjónuð er úr ull frá Urði Ullarvinnslunni sem er fyrirtæki sem hún stofnaði sjálf og rekið er í fjárhúsum frá árinu 1954 að Rauðbarðarholti. Hafa þau aðallega framleitt garn úr lambsull með eftirtektarverðum árangri en hugmyndin kviknaði einmitt í Skerðingsstaðarétt árið 2022.

Lilja Björg Ágústsdóttir sveitarstjóri

Þessi frétt Dagbók sveitarstjóra vikan 30. ágúst – 13. september sást fyrst á Dalabyggð.

Fundurinn var haldinn að frumkvæði sveitarstjórnar Dalabyggðar með það að markmiði að fara yfir stöðu samgangna- og innviða¬mála í sveitarfélaginu, ræða helstu áskoranir, forgangsverkefni næstu ára og efla áfram gott samstarf sveitarfélagsins og Vegagerðarinnar.

Á fundinum var meðal annars fjallað um stöðu vegakerfisins í Dalabyggð, viðhald og öryggi vega, vetrarþjónustu, verkefni á vegum Vegagerðarinnar sem eru í undirbúningi eða framkvæmd, auk þeirra framkvæmda sem sveitarfélagið telur mikilvægt að verði settar í forgang á næstu árum. Einnig var rætt um mikilvægi greiðra samgangna fyrir íbúa, atvinnulíf og ferðaþjónustu. Lögð var áhersla á að í Dalabyggð hefur verið töluverð uppbygging, fjölgun íbúa og bygging nýrrar og glæsilegrar íþróttamiðstöðvar. Greiðar samgöngur eru mikilvægur þáttur áframhaldandi jákvæðri byggðarþróun á svæðinu.

Á fundinum staðfestu fulltrúar Vegagerðarinnar að fara eigi í tvo kafla á Vestfjarðarvegi á næstu mánuðum. Í lok þessa mánaðar er stefnt að úboði á kaflanum frá Erpstöðum að Haukdadalsá og að framkvæmdir hefjist fljótlega. Einnig á að fara í annan fjölfarin kafla á Vestfjarðarvegi um Saurbæ en munu framkvæmdir á þeim hluta hefjast á þessu ári og ljúka árið 2027. Þá var staðan á Skógarstrandavegi rædd og allir sammála um að það sé mikið hagsmunamál að koma slitlagi á þá leið enda er gert ráð fyrir þeirri framkvæmd inni á núgildandi samgönguáætlun. Ákveðið var að stofna samráðshóp þar sem bæði eiga sæti fulltrúar frá Vegagerðinni og Dalabyggð til að vinna umferðaröryggisáætlun fyrir sveitarfélagið og eiga samráð um þau sameiginlegu uppbyggingarverkefni sem eru framundan.

Fundarmenn lýstu ánægju með opið og uppbyggilegt samtal og þakkar sveitarstjórn Dalabyggðar fulltrúum Vegagerðarinnar fyrir góða heimsókn.

Þessi frétt Sveitarstjórn Dalabyggðar fundar með fulltrúum Vegagerðarinnar sást fyrst á Dalabyggð.

Fyrir nokkru voru gerðar breytingar á barnaverndarlögum nr. 80/2002 sem m.a. fólst í því að barnaverndarnefndir voru lagðar niður en í þeirra stað tóku til starfa Umdæmisráð. Þá voru sett inn lágmarksskilyrði varðandi íbúafjölda en hver barnaverndarþjónusta verður að telja að lágmarki 6000 íbúa. Er með þessu verið að leggja ríka áherslu á að minni sveitarfélög standi saman að sameiginlegri barnaverndarþjónustu.

Dalabyggð hefur síðustu ár fengið undanþágu frá Mennta- og barnamálaráðuneytinu til að starfrækja barnaverndarþjónustu en nú hefur verið tekin ákvörðun um að óska formlega eftir viðræðum um samstarf með það að markmiði að efla faglega þjónustu við börn og fjölskyldur í sveitarfélaginu og tryggja að þjónustan uppfylli þær kröfur sem gerðar eru samkvæmt lögum og viðmiðum.

Þessi frétt Dalabyggð hefur formlegt samtal við Barnaverndarþjónustu Vesturlands sást fyrst á Dalabyggð.

Þessi frétt Ársskýrsla Brothættra byggða fyrir árið 2025 er komin út sást fyrst á Dalabyggð.

Reglur  eru vegna íbúðarhúsnæðis til eigin nota, þar sem ekki er stunduð atvinnustarfsemi og fyrir
þá sem eiga lögheimili í Dalabyggð.

Sjá hér vefslóð á reglurnar sem eru aðgengilegar á heimasíðu Dalabyggðar:

REGLUR um garðslátt elli og örorkulífeyrisþega 2026

Þessi frétt Uppfærðar reglur um garðslátt elli- og örorkulífeyrisþega sást fyrst á Dalabyggð.

Samkvæmt viljayfirlýsingunni verður unnið að því að Dalabyggð taki hluta húsnæðisins á leigu undir starfsemi slökkviliðs sveitarfélagsins, þar sem komið yrði fyrir aðstöðu fyrir tæki, búnað og starfsemi slökkviliðsins. Samhliða verður horft til frekari þróunar á húsnæðinu og nærliggjandi svæðis með það að markmiði að skapa öfluga sameiginlega aðstöðu fyrir viðbragðsaðila í sveitarfélaginu.

Meðal þess sem horft verður til eru sameiginleg fundar- og fræðslurými, búnings- og hvíldaraðstaða, lager- og búnaðarrými auk æfinga- og kennsluaðstöðu. Þá er einnig gert ráð fyrir að fleiri viðbragðsaðilar geti komið að verkefninu síðar meir eftir því sem tilefni gefst til. Er þá m.a. horft til aðstöðu fyrir lögreglustöð sem sárvantar á svæðinu en til þessa hefur dómsmálaráðuneytið ekki brugðist við með neinum hætti óskum Dalabyggðar um samstarf í þá veru.

Aðilar viljayfirlýsingarinnar leggja áherslu á mikilvægi samnýtingar innviða, aukins samstarfs og hagkvæmni í rekstri með öryggi íbúa Dalabyggðar og annarra sem leið eiga um Dali að leiðarljósi. Viljayfirlýsingin markar því vonandi spennandi fyrsta skref í átt að enn öflugri viðbragðsþjónustu í Dalabyggð.

Á mynd hér með má sjá fulltrúa Björgunarsveitarinnar með fulltrúum Dalabyggðar og slökkviliðsins, frá vinstri Sindri Geir, Helgi Fannar, Guðmundur formaður Björgunarsveitarinnar, Bjarki sveitarstjóri og Skjöldur Orri slökkviliðsstjóri.

Þessi frétt Dalabyggð og Björgunarsveitin Ósk undirrita viljayfirlýsingu sást fyrst á Dalabyggð.

Þann 16. maí nk. fara fram sveitarstjórnarkosningar og af því tilefni vil ég hvetja Dalamenn til að íhuga alvarlega að gefa kost á sér til starfa í sveitarstjórn Dalabyggðar næsta kjörtímabil um leið og ég þakka fyrir góða mætingu á kynningarfund framkominna frambjóðenda í Dalabúð þann 7. maí sl. og þær umræður sem þar fóru fram.

Sveitarstjórnarstörf eru í senn bæði krefjandi og skemmtileg en einnig gefandi vettvangur til að leggja sitt af mörkum í þágu samfélagsins. Þar gefst fólki tækifæri til að hafa raunveruleg áhrif á þróun byggðarinnar, þjónustu við íbúa, uppbyggingu innviða og þau fjölmörgu verkefni sem gera gott samfélag enn betra. Sveitarstjórnarmál eru nefnilega ekkert annað en daglegt líf fólks – bara stundum með aðeins fleiri fundargerðum og jú, stundum aðeins fleiri kaffibollum og ekki spillir fyrir vilji til samvinnu, samtals og virkrar hlustunar. Góð samvinna á því kjörtímabili sem nú er að líða undir lok, innan stjórnsýslu og ekki síður innan samfélagsins alls í Dölum, á stóran þátt í því hve okkur hefur miðað vel áfram hér í Dölum – öflug liðsheild hefur og mun skipta sköpum til framtíðar litið.

Í Dalabyggð er viðhaft persónukjör og því er mikilvægt að áhugasamt fólk stígi fram og láti vita af áhuga sínum. Kjörnir eru sjö aðalmenn í sveitarstjórn og sjö varamenn og því þarf fjölbreyttan og öflugan hóp fólks sem hefur áhuga á að leggja sitt af mörkum til samfélagsins okkar.

Dalabyggð er samfélag með sterkan grunn, mikinn kraft og fjölmörg tækifæri framundan. En ekkert gerist af sjálfu sér. Framþróun byggir á fólki sem hefur vilja til að taka þátt, koma með hugmyndir, takast á við verkefni og hafa áhrif á nærumhverfi sitt.

Því vil ég hvetja Dalamenn til að stíga fram, taka þátt og íhuga þetta áhugaverða og mikilvæga hlutverk í þágu samfélagsins.

Undirritaður er tilbúinn til samtals við áhugasama frambjóðendur um stöðu mála og möguleg áform um enn frekari styrkingu innviða hér í Dölum.

Áfram Dalir og Dalabyggð !

Bjarki Þorsteinsson, sveitarstjóri

Þessi frétt Föstudagsmoli sveitarstjóra – hvatning um þátttöku í sveitarstjórnarkosningum sást fyrst á Dalabyggð.

Þessi frétt Sveitarstjórnarfundur 16. apríl 2026 – tæknileg vandamál sást fyrst á Dalabyggð.

Það er ómetanlegt að finna þann stuðning sem uppbygging Íþróttamiðstöðvarinnar nýtur í samfélaginu í Dölum eins og hér raungerist með stuðningi og fjárstyrk eins og hér um ræðir.

Hafið kæra þökk félagar í Rauða kross deildinni !

Á mynd hér með má sjá þau Sigurð Ólafsson formann og Sigurdísi E.L. Sigursteinsdóttur gjaldkera Rauða kross deildarinnar með þeim Bjarka og Ísaki.

Þessi frétt Höfðinglegur styrkur frá RK deild í Dölum og Reykhólahreppi sást fyrst á Dalabyggð.

Frumkvæði að verkefninu hafði Sigurbjörg Kristínardóttir, fyrrverandi tónlistarkennari og organisti í Dalabyggð og víðar, og með henni í undirbúningshóp eru þau Kristín G Ólafsdóttir og Ólafur Rúnarsson. Markmið framtaksins er að safna fyrir nýjum flygli fyrir Dalabúð, en núverandi flygill er kominn til ára sinna.

Á undanförnum árum hafa orðið breytingar á starfsemi í Dalabúð. Með tilkomu nýs íþróttahúss í Búðardal hefur íþróttastarfsemi flust úr félagsheimilinu, sem skapar tækifæri til að þróa Dalabúð frekar sem menningarhús fyrir íbúa og gesti. Góð hljóðfæri eru mikilvæg forsenda fyrir fjölbreyttu tónlistar- og menningarstarfi, auk þess sem flygillinn verður nýttur í kennslu og tónleika á vegum tónlistarskólans.

Áætlaður kostnaður við flygil af þeirri stærð og gæðum sem stefnt er að því að kaupa er um 5 milljónir króna. Verkefnið hefur þegar hlotið 2,5 milljónir króna í styrki, og hefur hljóðfæri verið tekið frá tímabundið hjá Tónastöðinni á meðan unnið er að fjármögnun þess.

Öll vinna við söfnunina er unnin í sjálfboðavinnu og á næstunni verða haldnir að minnsta kosti tvennir fjáröflunartónleikar þar sem listamenn með tengingu við Dalina gefa vinnu sína. Auk þess verður leitað til fyrirtækja, félagasamtaka og einstaklinga um stuðning.

Þeir sem vilja leggja verkefninu lið eða fá frekari upplýsingar geta haft samband við Sigurbjörgu Kristínardóttur í síma 864 7772 eða með tölvupósti á sibbo52@gmail.com.

Framlög til verkefnisins má leggja inn á söfnunarreikning í samstarfi við sönghópinn Hljómbrot:

Kennitala: 420523-2030
Banki: 0133-15-13241

Þessi frétt Söfnun hafin fyrir nýjum flygli í Dalabúð sást fyrst á Dalabyggð.

Um er að ræða tilraunaverkefni sem miðar að því að bregðast við skorti á fjárfestingu í atvinnuhúsnæði á landsbyggðinni. Markmið verkefnisins er að skapa aðstöðu fyrir atvinnustarfsemi á svæði þar sem skortur á hentugu húsnæði hefur hamlað frekari uppbyggingu og nýsköpun.

Af ýmsum ástæðum varð ákveðið hlé í undirbúningi þessa sl. haust en nú ræsum við að nýju, af fullum krafti og af því tilefni og í tengslum við verkefnið verður Rúnar Þór Guðbrandsson, fulltrúi Byggðastofnunar, til viðtals og samráðs við áhugasama aðila í Búðardal. Hann verður með viðveru á skrifstofu Dalabyggðar (Nýsköpunarsetrinu) eftir hádegi miðvikudaginn 18. mars og fram að hádegi föstudaginn 20. mars n.k.

Áhugasamir eru hvattir til að bóka fund með því að senda tölvupóst á runar@dugandi.is eða hringja í síma 861-4000.

Þessi frétt Uppbygging atvinnuhúsnæðis í Búðardal – næstu skref sást fyrst á Dalabyggð.

DalaAuður_Ársskýrsla 2025_útgáfa

Við þökkum öllum þeim sem komið hafa að vinnunni með einum eða öðrum hætti, ekki síst verkefnastjóranum okkar dýrmæta, Lindu Guðmundsdóttur sem ásamt verkefnastjórn heldur utan um verkefnið allt af myndugskap.

Vitnum hér beint í niðurlag skýrslunnar og orð Lindu þar sem hún segir m.a.:

„Stórstjörnur DalaAuðs voru eins og síðustu ár íbúar sveitarfélagsins, sem létu til sín taka á öllum sviðum mannlífsins og atvinnulífsins. Það er oft sagt að í Dölunum hafi allir marga hatta og er það dagsatt. Hér vinnur fólk samhent að því að halda úti íþróttastarfi fyrir börn, starfrækja leikfélag, stika gönguleiðir, halda úti líkamsrækt, bjóða upp á vörur og þjónustu í héraði og margt fleira. Haldin voru námskeið, viðburðir og erindi um hin ýmsu málefni og af mismunandi toga og félagslífið dafnaði vel á árinu. Einstaklega gott sumar skilaði sér í frábærum afurðum, sem hægt var að kaupa beint af býlum. Beint frá býli dagurinn var reyndar haldinn með pompi og prakt og einnig alþjóðlegi ostadagurinn í Dölunum, nánar tiltekið á Erpsstöðum og framleiðendur úr Dölum voru einnig duglegir að mæta með sínar vörur á markaði víðs vegar um land. Slíkar kynningar eru mikilvægar fyrir matvælahéraðið Dali.

Sem verkefnisstjóri DalaAuðs lenti ég oft á tali við fólk sem býr annars staðar, sérstaklega fólk á Vesturlandi, sem hafði orð á því að það „væri allt að gerast“ í Dölunum. Mörgum fannst Dalirnir meira áberandi en áður í umræðunni, frumkvæðisverkefni sem þar væru í gangi virtust ganga vel og væru sýnileg í fjölmiðlum og mikil uppbygging virtist vera á svæðinu, séð utan frá. Það er mikil hvatning að heyra þetta frá nágrönnum okkar og finna að þeir samgleðjast Dalamönnum.Dalamenn mega líka vera stoltir af því sem þeir eru og öllum þeim verkefnum sem hrundið hefur verið af stað á síðustu árum.“

Orð að sönnu hjá Lindu – vel gert íbúar Dalabyggðar !

Þessi frétt Ársskýrsla Dala Auðs 2025 sást fyrst á Dalabyggð.