Þessi frétt Bifreiðasýning í stjórnsýsluhúsinu sást fyrst á Dalabyggð.

Við í stjórnsýsluhúsinu kvöddum Magnínu Kristjánsdóttur eða Ínu eftir tæplega 40 ára störf fyrir sveitarfélagið. Ína býr yfir mikilli þekkingu og það hefur verið einstaklega gott að leita til hennar með hvað það sem hefur komið upp. Það hafa eflaust flestir sem hafa starfað hjá sveitarfélaginu þurft að leita í viskubrunn hennar í gegn um árin. Er henni þakkað kærlega fyrir vel unnin störf og óskað velfarnaðar í framtíðinni.

Sveitarstjórar á Vesturlandi voru boðaðir á fund í húsakynnum SSV í Borgarnesi með fulltrúum Umhverfis- og orkustofnunar. Þar var farið yfir stöðu flutnings heilbrigðiseftirlits frá sveitarfélögum til ríkisins og rætt um næstu skref. Ljóst er að ákveðin verkefni verða áfram á hendi sveitarfélaganna og virðist verkaskiptingin, við fyrstu sýn, nokkuð skynsamleg. Áhersla verður áfram á að sveitarfélög sinna reglubundnum staðbundnum verkefnum.

Við Guðbrandur Tumi, varaoddviti Dalabyggðar, áttum morgunkaffifund með Gunnari lögreglustjóra á Vesturlandi og Jóni Arnari varðstjóra. Þar fórum við yfir stöðu löggæslumála í umdæminu og fengum kynningu á samfélagslöggæslu. Fundurinn var mjög gagnlegur og gott að fá innsýn í störf lögreglunnar og tölfræði sem tengist starfseminni.

Að fundi með lögreglunni loknum héldum við Tumi á fund með þingmönnum Norðvesturkjördæmis. Það olli nokkrum vonbrigðum að aðeins fjórir af sjö þingmönnum mættu til fundarins og að eini ráðherra kjördæmisins skyldi ekki sjá sér fært að vera viðstaddur. SSV fór yfir helstu hagsmunamál kjördæmisins og að því loknu fékk hvert sveitarfélag tækifæri til að koma sínum áherslum á framfæri. Fyrir hönd Dalabyggðar voru samgöngumál, húsnæðismál, umgjörð landbúnaðar og löggæslumál meðal helstu áhersluatriða.

Þann 8. október var haldinn opinn íbúafundur um menningarmál og framtíð menningarhúsa. Fundurinn var afar vel sóttur og þar komu fram margar góðar hugmyndir sem menningarmálanefnd Dalabyggðar mun vinna áfram með á komandi misserum.

Ingibjörg Þóranna oddviti, Skjöldur Orri formaður fræðslunefndar og sveitarstjóri Dalabyggðar áttu fund með félagsmálastjóra og sviðsstjóra fjölskyldusviðs Borgarbyggðar vegna mögulegrar inngöngu Dalabyggðar í Barnaverndarþjónustu Vesturlands. Nú liggur í grófum dráttum fyrir hver kostnaðurinn verður og hvernig verkaskiptingu verður háttað. Stefnt er að gerð samstarfssamnings sem lagður verður fyrir sveitarstjórn fljótlega og vonast er til að vinnunni ljúki fyrir áramót.

Ég fékk þann heiður að afhenda ungum lestrarhestum gjafir og viðurkenningar fyrir frábæran árangur og þátttöku í lestrarbingói sumarsins. Það var sérstaklega ánægjulegt að sjá hversu mörg börn tóku þátt og skiluðu glæsilegum árangri.

Ársfundur Samtaka sveitarfélaga á köldum svæðum var einnig haldinn í vikunni. Dalabyggð er eitt aðildarsveitarfélaga samtakanna sem voru stofnuð árið 1996. Markmið þeirra er meðal annars að vinna að lækkun orkukostnaðar til húshitunar á köldum svæðum, stuðla að frekari jarðhitaleit, miðla upplýsingum um orkumál og efla vitund almennings um orkusparnað. Ég var kjörinn í varastjórn samtakanna, en bæði aðal- og varastjórn taka þátt í reglulegum stjórnarfundum. Jóhann Páll Jóhannsson umhverfis- orku- og loftlagsráðherra ætlaði upphaflega að mæta á fundinn en þurfti að sinna erindum erlendis og mætti á fundinn í gegn fjarfundarbúnað úr aftursætinu á leigubíl.

Miðvikudaginn 7. október mætti ég á stofnfund Samtaka landbúnaðarsveitarfélaga fyrir hönd Dalabyggðar og staðfesti þar þátttöku sveitarfélagsins í samtökunum. Á fundinum voru samþykktir lagðar fram og kosið í stjórn. Fundurinn var mjög fjölmennur, sem ber vitni um hversu mikil þörf hefur verið fyrir formlegan vettvang sveitarfélaga sem byggja afkomu sína að verulegu leyti á landbúnaði.

Sama dag fór fram ársfundur Jöfnunarsjóðs sveitarfélaga, en þann fund sækja framkvæmdarstjórar sveitarfélaga. Ánægjulegt er að staða sjóðsins er sterk og í ljósi þess ákvað ráðherra að hækka almenn jöfnunarframlög um 1,4 milljarða króna á árinu, sem mun styrkja fjárhag sveitarfélaga víða um land.

Dagana 8. og 9. október fór fram Fjármálaráðstefna sveitarfélaga. Frá Dalabyggð sóttu ráðstefnuna sex fulltrúar, bæði úr hópi kjörinna fulltrúa og starfsfólks sveitarfélagsins. Ráðstefnan var bæði fróðleg og skemmtileg, en jafnframt mikilvægur vettvangur til að miðla reynslu, bera saman bækur og efla tengslanet sveitarstjórnarfólks víðs vegar af landinu.

Barnó, barnamenningarhátíð Vesturlands, stendur nú yfir og verður dagskrá í boði út allan mánuðinn. Ég mætti á sýninguna Shjówmenn – sirkussýning um sjómennsku og opið sirkusnámskeið sem fram fór að Laugum í Sælingsdal. Við fjölskyldan skemmtum okkur konunglega og enduðum daginn síðan í sundlaug íþróttamiðstöðvarinnar í Búðardal. Það er fátt meira afslappandi en að sitja í gufunni og horfa út yfir sjóinn.

– Lilja Björg Ágústsdóttir sveitarstjóri

Þessi frétt Dagbók sveitarstjóra 27. september – 11. október sást fyrst á Dalabyggð.

Uppbyggingarsjóður Vesturlands er nú opinn fyrir umsóknir. Sjóðurinn styður fjölbreytt verkefni á sviði menningar, atvinnuþróunar og nýsköpunar auk þess að veita stofn- og rekstrarstyrki á sviði menningarmála á Vesturlandi. Sjóðurinn er samkeppnissjóður og eru umsóknir metnar út frá þeim markmiðum og áherslum sem koma fram í Sóknaráætlun Vesturlands.

Umsóknarfrestur er til 21. október kl. 14:00 og er sótt um í gegnum umsóknargátt Rannís líkt og síðast, sjá hér: Umsóknagátt

Umsækjendur eru hvattir til að leita aðstoðar hjá ráðgjöfum SSV sem eru boðnir og búnir að veita umsækjendum góð ráð við gerð umsókna.

Menningarverkefni (verkefnastyrkir og stofn- og rekstrarstyrkir) Sigursteinn Sigurðsson í síma 433-2313 eða 698-8503 Netfang; sigursteinn@ssv.is

Atvinnuþróunar og nýsköpunarverkefni

Ólöf Guðmundsdóttir í síma 898-0247 Netfang: olof@ssv.is

Helga Guðjónsdóttir í síma 895-6707 Netfang: helga@ssv.is

Hrafnhildur Tryggvadóttir í síma 849-2718 Netfang: hrafnhildur@ssv.is

Nánari upplýsingar um Uppbyggingarsjóð er á finna á vef SSV; Uppbyggingarsjóður Vesturlands

Kynningarfundur

SSV býður til opins kynningarfundar um Uppbyggingarsjóð Vesturlands föstudaginn 16. október kl. 12:00–13:00.

Á fundinum verður farið yfir markmið sjóðsins, styrkjaflokka og úthlutunarreglur. Einnig verður farið í gegnum umsóknarkerfið og gefin hagnýt ráð um gerð umsókna.

Fundurinn fer fram á Teams og verður jafnframt í beinu streymi á Facebook, þar sem áhorfendur geta komið á framfæri spurningum sem svarað verður á fundinum.

Fundurinn er öllum opinn og sérstaklega ætlaður þeim sem hafa hug á að sækja um styrk til verkefna á Vesturlandi.

Athugið: Fundurinn verður tekinn upp og upptakan gerð aðgengileg á miðlum SSV að honum loknum.

Verið hjartanlega velkomin að skjánum!

Hlekkur á TEAMS.

Þessi frétt Opið fyrir umsóknir í Uppbyggingarsjóð Vesturlands og kynningarfundur sást fyrst á Dalabyggð.

Þessi frétt Vel sóttur fundur um menningarmál og menningarhús sást fyrst á Dalabyggð.

Barnó er nú haldin í annað sinn og fer fram víðs vegar um Vesturland. Í ár telur dagskráin hvorki meira né minna en 65 fjölbreytt atriði, ætluð börnum og ungmennum frá leikskólaaldri og upp í 18 ára.

Í Dalabyggð verður ýmislegt um að vera og munum við uppfæra dagskránna hér í þessari frétt eftir því sem viðburðir bætast við.

Við hvetjum ykkur að sjálfsögðu til að taka þátt í sem flestum viðburðum, sem eru börnum að kostnaðarlausu!

Barnó er fjölskylduhátíð og því höfðum við til foreldra/forráðamanna að fylgja yngri börnum á viðburði.

Sjá dagskrá hér fyrir neðan: 

2. október

Carla Maeso verður með fjölskyldusirkusdag í Dalabúð, föstudaginn 2. október nk. frá kl. 15:00 – 18:30

Um er að ræða vinnustofu þar sem þrjár ólíkar greinar sirkuslistarinnar eru teknar fyrir.
Carla hefur numið sirkuslistir við tvo evrópska sirkusskóla. Viðburðurinn hentar fólki af öllum gerðum þar sem hægt er að aðlaga sköpun og sirkuslistina að hverjum og einum þátttakenda.

3. október

Námskeið í skartgripagerð með DalaMey

Í Auðarskóla, 3. október kl. 09:00 og eftir hádegi, 13:30 og 6. október kl. 16:00.

Látum sniðin á horninu leiða okkur áfram hvernig hálsmenið mun verða. Því ekkert horn er eins, hægt væri að segja eins og fingrafar okkar manna.

Aðeins 5 komast að á hvert námskeið.

Skráning fer fram á sigurdis89@gmail.com

Ath. ef einstaklingur er með öndunarfærasjúkdóm er ekki mælt með þessu námskeiði.

6. október

Námskeið í skartgripagerð með DalaMey

Í Auðarskóla, 3. október kl. 09:00 og eftir hádegi, 13:30 og 6. október kl. 16:00.

Látum sniðin á horninu leiða okkur áfram hvernig hálsmenið mun verða. Því ekkert horn er eins, hægt væri að segja eins og fingrafar okkar manna.

Aðeins 5 komast að á hvert námskeið.

Skráning fer fram á sigurdis89@gmail.com

Ath. ef einstaklingur er með öndunarfærasjúkdóm er ekki mælt með þessu námskeiði.

10. október

Shjówmenn sirkussýning um sjómennskuna & opið sirkusnámskeið á BARNÓ. 

Haldið í íþróttasalnum hjá Dalahótel að Laugum í Sælingsdal, laugardaginn 10. október kl. 14:00

Einhvers staðar lengst úti á ballarhafi eru tveir sirkuslistamenn að reyna að veiða hugmyndir. Þeir kasta á milli sín fiskileifum, djöggl áhöldum, hvössum augnaráðum, veiðineti og ýmsu fleira, og enginn veit hvert förinni er heitið. Í nýsirkussýningunni Shjówmenn kynnumst við tveimur trúðum sem takast á við efnisheim og menningararf sjómennskunnar með sprúðlandi leikgleði sirkuslistanna. Sýningin hentar áhorfendum á breiðum aldri og notast takmarkað við talað mál.

11. október

Klappleikir með Sigga&Ingibjörgu er fjörug fjölskyldusmiðja þar sem áhersla er lögð á leik, samveru og tónlist með einföldum og skemmtilegum klappleikjum og söngvum. Einu hljóðfærin sem við þurfum að taka með okkur erum við sjálf. Ókeypis aðgangur.

Haldið í Félagsheimilinu Dalabúð í Búðardal, hefst kl.11:00

Klappsmiðjan er tilvalin leið fyrir börn að njóta tónlistar, hreyfingar og samveru.
Fjölskylduvænt og frítt – öll hjartanlega velkomin! Ókeypis aðgangur.

Sigurður Ingi Einarsson og Ingibjörg Fríða Helgadóttir eru reyndir smiðjuleiðbeinendur og tónlistarfólk. Hann er slagverksleikari og hún er söngkona og saman munu þau leiða þátttakendur í klappi, stappi og söng.

Öll börn og fullorðnir fara syngjandi heim með nýja leiki sem vekja gleði og kátínu!

 Aldur: 4-10 ára og fullorðnir (yngri og eldri systkini velkomin með!)
Tungumál: Smiðjan fer að mestu fram á íslensku en aðgengileg fjölskyldum með önnur móðurmál.

13. október

Tónlist og sköpunarsmiðja.
Sögur gegnum tónlist (Stories from music), verður haldin í Dalabúð, þriðjudaginn 13. október kl. 17:00

Juan Pablo Cerezales spilar tónlist og börnin skapa sögur og myndskreytingar út frá því hvað þau finna í tónlistinni. 

Stories from music. A fun journey through music and storytelling with Juan Pablo Cerezales.

Þessi frétt Dagskrá BARNÓ í Dalabyggð sást fyrst á Dalabyggð.

Hlökkum til að sjá ykkur!

Þessi frétt Verðlaun fyrir þátttöku í bókabingói sást fyrst á Dalabyggð.

Íþróttavikan okkar byrjaði þann 22. september þegar að hann Guðmundur Brynjar Júlíusson (Gummi) kom og var með sundnámskeið fyrir börn í 1.-4. bekk. Þar mættu sex krakkar, þrír strákar og þrjár stelpur og gekk það mjög vel að sögn Gumma

Síðar sama dag var Gummi með Skriðsundsnámskeið fyrir fullorðna en þar voru þau þrjú sem mættu og nýttu sér það tækifæri. Tvær konur og einn karl. þar sem þau voru þrjú þá þýddi það að þau gátu verið með heila sundbraut fyrir sig. Námskeiðið gekk vel og sagðist Gummi hafa séð mikla framför hjá þeim sem mættu.

Sundlaugin í Búðardal

Þann 23. september fékk Auðarskóli heimsókn frá Borðtennissambandi Íslands, Frjálsíþróttasambandi Íslands og Bergþóri Olivert Thorstenssyni folfara (frisbí golfara). Auður Tinna Aðalbjarnardóttir frá Borðtennissambandinu var með smá grunnáherslur í borðtennis, fór yfir reglur leiksins og endaði á skemmtilegum leik. UDN (Ungmennasamband Dalamanna og Norður Breiðfirðinga) styrkti Auðarskóla með kaupum á 16 glænýjum borðtennisspöðum. Björg Gunnarsdóttir var með kynningu á frjálsum íþróttum inni í félagsheimilinu Dalabúð og fór með krakkana í nokkra leiki og æfði kastgreinar. Bergþór Olivert Thorstensen var með kynningu á Frisbígolfi, hann var með kynninguna úti á sparkvellinum hjá Auðarskóla og lét rigninguna ekki trufla sig.

Miðstigsbekkirnir í borðtennis

Yngsta stigið í frjálsum íþróttum í Dalabúð

Miðstigsbekkirnir í folf æfingum úti á sparkvelli

Fimmtudaginn 24. september mætti Guðríður S Brynjarsdóttir (Gauja) með flot í sundlaugina í Búðardal. Það voru fjórtán konur sem skráðu sig á námskeiðið og mættu þær allar. Til stóð að hita sundlaugina upp í ~37°C en það er kjörhitastig fyrir flot og hugleiðslu í vatni. Sundlaugin var komin upp í 36°C að morgni fimmtudags en hafði lækkað niður í 33°C þegar kom að námskeiðinu vegna mikillar vindkælingar. Gauja mætti með flothettur og fótaflot fyrir alla. Námskeiðið gekk vel fyrir sig og voru þátttakendur og Gauja gríðarlega ánægð að námskeiðinu loknu þrátt fyrir að hitastigið og veðrið hafi sett smá strik í reikninginn.

Hér er flotið um allt með flothettur og fótaflot á fótum

Mánudaginn 24. september var Carla Maeso Mota með Vinyasa Jóganámskeið inni í félagsheimilinu Dalabúð. Vinyasa er stundum kallað flæðisjóga á íslensku en þar er lögð meiri áhersla á flæði í hreyfingum og jógastöðum í stað þess að halda jógastöðunum til lengri tíma. Það mættu 11 manns á jóganámskeiðið og er ákall eftir reglulegum jógatímum í sveitarfélaginu.

Carla Jógakennari

Íþróttavikunni lauk síðan miðvikudaginn 30. september með Sundlaugarpartýi í Sundlauginni í Búðardal. Sundlaugin var hituð upp fyrir þann viðburð, sett upp diskóljós og borð fyrir plötusnúð. 44 manns á öllum aldri mætti í sundlaugarpartýið og var þar mikið fjör, mikil stemning og allt sundlaugardót notað í lauginni. DJ Jacuzzi spilaði tónlist fyrir sundlaugargestina.

það var margt um manninn

DJ Jacuzzi „þeytir skífum“

Skipuleggjendur íþróttavikunnar vilja koma þökkum sínum á framfæri fyrir jákvæðar undirtektir og góða þátttöku á viðburðum íþróttavikunnar! Samtals voru þátttakendur á öllum viðburðum í Dalabyggð 144 talsins.

Þessi frétt Það helsta úr Íþróttaviku Evrópu 2026 sást fyrst á Dalabyggð.

Þessi frétt Skrifstofa Sýslumanns lokuð 01.10.2026 sást fyrst á Dalabyggð.

Þar komu saman 41 ungmenni víðsvegar að af Vesturlandi en Dalabyggð átti einn fulltrúa úr sínu ungmennaráði á staðnum, hann Óliver Sebastian Týr Almarsson. Ungmennaráðin voru saman komin til þess að ræða málefni sem brenna á ungu fólki og móta sameiginlega sýn á framtíð svæðisins.

Dagskrá þingsins einkenndist af líflegum umræðum, vinnustofum og samvinnu þátttakenda. Afrakstur þingsins var ályktun Ungmennaþings Vesturlands þar sem fram komu áherslur og tillögur ungmenna um málefni sem þau telja mikilvægt að fái aukið vægi í samfélaginu.

Á þingið mættu einnig alþingismenn og sveitarstjórnarfólk af Vesturlandi til samtals við þátttakendur. Frá Dalabyggð voru mætt þau Sigurvin Þórður Viðarsson og Valdís Gunnarsdóttir

Ályktun þingsins var kynnt og rædd og skapaðist í kjölfarið opið og uppbyggilegt samtal milli ungmennanna og kjörinna fulltrúa. Þar fengu stjórnmálamenn tækifæri til að hlýða á sjónarmið ungs fólks og kynnast þeim verkefnum og áskorunum sem þau telja mikilvægt að horfa til á komandi árum.

Þingið tókst afar vel og sýndi skýrt fram á mikilvægi þess að skapa vettvang þar sem rödd ungs fólks fær að heyrast. Ljóst er að kjörnir fulltrúar fengu með sér fjölmörg verkefni og hugmyndir til frekari umræðu og úrvinnslu í sínu starfi.

Þegar ungmenni fá tækifæri til að eiga raunverulegt samtal við ákvörðunartökufólk verða til hugmyndir sem geta styrkt samfélagið allt. Ungmennaþingið er mikilvægur vettvangur fyrir slíka þátttöku og áhrif.

Þessi frétt Dalabyggð átti fulltrúa á ungmennaþingi vesturlands 2026 sást fyrst á Dalabyggð.

Vinna við gerð fjárhagsáætlunar fyrir næsta ár er komin vel á veg. Deildarstjórar vinna nú að yfirferð þeirra málaflokka sem heyra undir hverja deild, en á sama tíma eru fastanefndir sveitarfélagsins að fjalla um fjárhagsáætlunina og fara yfir fjárhagsramma, áherslur og gjaldskrár. Gert er ráð fyrir að þeirri vinnu ljúki 9. október.

Ég átti einnig fund með sveitarstjórum Reykhólahrepps og Strandabyggðar, en sveitarfélögin standa saman að rekstri byggðasamlags um slökkviliðsmál. Slökkviliðsstjóri sat fundinn og var farið yfir stöðu rekstursins og helstu verkefni fram undan. Jákvæð þróun hefur átt sér stað innan slökkviliðsins, þar sem töluverð endurnýjun hefur orðið í hópnum og áhugi á starfinu er mikill. Á fundinum var ákveðið að leita til Húsnæðis- og mannvirkjastofnunar til að fá ráðgjöf um hvernig best verði staðið að samstarfinu til framtíðar. Ljóst er að áfram eru tækifæri til að efla samstarfið enn frekar, bæði með markvissri uppbyggingu innviða og með því að styrkja þjónustuna við íbúa.

Það var tekið vel á móti mér á Eiríksstöðum þar sem ég kíkti við einn miðvikudaginn. Bjarnheiður Jóhannsdóttir fór með mér um svæðið og sagði mér frá allri uppbyggingunni sem hefur átt sér stað þar síðustu ár. Mikið af fallegu handverki var til sölu, skartgripir, drykkjahorn, skrautmunir og fleiri skemmtilegar gjafavörur. Tilgátuhúsið var fullt af gestum sem sátu og hlýddu á frásögn starfsmanna í ljúfri stemmingu við langeldinn. Upplifunin er eiginlega líkust því að ferðast aftur í tímann en það er vel hægt að gera sér í hugarlund hvernig aðstæður voru á 10. öld. Það var líka gaman að ganga um göngustígana, skoða rústirnar, styttur og fleira skemmtilegt.

Rifið var gólfið af salnum í nýju íþróttamiðstöðinni en um var að ræða einhverskonar galli í virkni gólfsins sem gerði það að verkum að nýttist ekki alveg sem skyldi. Sjálfboðaliðar á vegum íþróttafélagsins Undra sáum um að rífa gólfið af og enn og aftur sýndi það sig hversu góð samstaða er í samfélaginu ef verk þarf að vinna. Yfir 20 sjálfboðaliðar mættu og voru ekki lengi að klára verkið. Slíkur kraftur og vilji til að leggja hönd á plóg er eitt af því sem gerir samfélagið okkar svo sterkt

Laugardaginn 19. september fór fram ársfundur SÍHU sem Nikkolína í samstarfi við Dalahótel hélt að Laugum í Sælingsdal. Að loknum fundarstörfum var boðið upp á hátíðarkvöldverð þ.e. glæsilegt steikarhlaðborð og svo fyrsta flokks harmonikkuball. Við hjónin létum okkur að sjálfsögðu ekki vanta og áttum þar afar ánægjulega stund. Bæði maturinn og umgjörðin voru til fyrirmyndar en skemmtileg tónlist og góður félagsskapur settu svip sinn á kvöldið. Við nutum einnig þess að ganga um svæðið og njóta veðurblíðunnar á þessum fallegu og sögufrægu slóðum.

Eftir helgina var mér boðið í heimsókn til stórbóndans Eyjólfs í Ásgarði þar sem ég fékk að vera viðstödd lambadóm. Þar var saman kominn góður hópur fólks til aðstoðar, auk fulltrúa frá RML. Það var bæði fróðlegt og áhugavert að fylgjast með vinnunni og gaf hún góða innsýn í það faglega starf sem bændur leggja í ræktun og kynbætur sauðfjár. Augljóst er að mikill metnaður og þekking býr að baki þeirri starfsemi hér í sveitarfélaginu.

Þaðan lá leiðin til Akureyrar ásamt Sindra Geir Sigurðssyni sveitarstjórnarfulltrúa, þar sem við sátum Landsþing Sambands íslenskra sveitarfélaga fyrir hönd Dalabyggðar. Á þinginu var kjörin ný stjórn og lagðar línur fyrir starf sambandsins næstu fjögur árin. Landsþingið er mikilvægur vettvangur fyrir fulltrúa sveitarfélaga víðs vegar að af landinu til að ræða sameiginleg verkefni, helstu áskoranir og þau tækifæri sem blasa við sveitarstjórnarstiginu á komandi árum. Jafnframt gefst þar gott tækifæri til að mynda og efla tengsl við samstarfsfólk í öðrum sveitarfélögum. Á þinginu komu einnig saman fulltrúar þeirra sveitarfélaga sem skilgreina sig sem landbúnaðarsveitarfélög. Þar var rætt um mögulega stofnun sérstaks samstarfs- og samráðsvettvangs fyrir þessi sveitarfélög, þar sem unnið yrði sameiginlega að hagsmunamálum sem tengjast landbúnaði og dreifbýli. Fundargestir voru almennt sammála um að málefni landbúnaðar fái oft takmarkaða umfjöllun í almennri umræðu um sveitarstjórnarmál. Ákveðið var að vinna hugmyndina áfram og kalla til fulltrúa frá Sambandi íslenskra sveitarfélaga til frekari umræðu og mótunar næstu skrefa.

Íþróttavika Evrópu er í fullum gangi en sett hefur verið saman metnaðarfull og fjölbreytt dagskrá að tilefni hennar. Að baki dagskránni standa UDN, Dalabyggð og Reykhólahreppur. Það geta allir fundið eitthvað við sitt hæfi en í dagsskránni má finna ýmis sundnámskeið, flot, frísbígolf, borðtennis, Qigong og margt fleira. Ég hvet að sjálfsögðu sem flesta til að taka þátt.

Lilja Björg Ágústsdóttir sveitarstjóri

Þessi frétt Dagbók sveitarstjóra 14. – 27. september sást fyrst á Dalabyggð.

Umsóknarfrestur er til 21. október kl. 14:00 og er sótt um í gegnum umsóknargátt Rannís líkt og síðast, sjá hér:  Umsóknagátt

Umsækjendur eru hvattir til að leita aðstoðar hjá ráðgjöfum SSV sem eru boðnir og búnir að veita umsækjendum góð ráð við gerð umsókna.

Menningarverkefni (verkefnastyrkir og stofn- og rekstrarstyrkir)
Sigursteinn Sigurðsson í síma 433-2313 eða 698-8503
Netfang; sigursteinn@ssv.is

Atvinnuþróunar og nýsköpunarverkefni

Ólöf Guðmundsdóttir í síma 898-0247
Netfang: olof@ssv.is

Helga Guðjónsdóttir í síma 895-6707
Netfang: helga@ssv.is

Hrafnhildur Tryggvadóttir í síma 849-2718
Netfang: hrafnhildur@ssv.is

Nánari upplýsingar um Uppbyggingarsjóð er á finna á vef SSV; Uppbyggingarsjóður Vesturlands

Þessi frétt Uppbyggingarsjóður er opinn fyrir umsóknir sást fyrst á Dalabyggð.

Skyldur

Eigendum hunda og katta ber að skrá dýr sín hjá skrifstofu sveitarfélagsins og sjá til þess að umhirða þeirra sé í samræmi við ákvæði laga, reglugerða og samþykkta sem um gæludýrahald kunna að gilda. Eigendum og umráðamönnum hunda, katta og annarra gæludýra ber, eftir því sem framast er unnt, að sjá svo um að dýr þeirra valdi ekki hávaða, ónæði, óþrifnaði eða óhollustu.

Eigendur hunda og katta skulu árlega greiða gjald fyrir hunda sína og ketti samkvæmt gjaldskrá nr. 1117/2025.

Eigendur hunda og katta skulu færa dýr sína árlega til ormahreinsunar hjá dýralækni. Sveitarfélagið upplýsir um hvenær árleg ormahreinsun fer fram, ormahreinsun er innifalin í skráningargjaldi. Ef eigandi dýrs getur af einhverjum ástæðum ekki mætt á tilsettum tíma skal hann afhenda sveitarfélaginu staðfestingu frá dýralækni um að ormahreinsun hafi farið fram.

Hundar

Allir hundar í þéttbýli eru skráningarskyldir hjá sveitarfélaginu.

Hundar sem notaðir eru við búrekstur á lögbýlum eru undanþegnir skráningar- og árgjaldi, en skylt er að framvísa til sveitarfélagsins númeri örmerkingar svo og árlegu vottorði um ormahreinsun.

Kettir

Allir kettir í þéttbýli eru skráningarskyldir hjá sveitarfélaginu.

Kettir í dreifbýli eru undanþegnir skráningar- og árgjaldi, en skylt er að framvísa til sveitarfélagsins númeri örmerkingar svo og árlegu vottorði um ormahreinsun.

Önnur gæludýr

Eigendum og umráðamönnum gæludýra annarra en hunda og katta er skylt að koma í veg fyrir að dýr þeirra sleppi úr haldi. Gerist það skal þegar gera ráðstafanir til að handsama dýrið.

Eigendur og umráðamenn gæludýra sem haldin eru utandyra, svo sem nagdýra, skulu sjá til þess að dýrin valdi ekki nágrönnum ama svo sem með hávaða, skemmdum eða óhreinindum. Skulu þeir tryggja að dýrin geti ekki nagað sig út úr búri eða aðhaldi.

Kanínur skulu einstaklingsmerktar skv. 1. mgr. 22. gr. laga um velferð dýra, nr. 55/2013.

Gjöld

Eigendur hunda og katta og annarra gæludýra eru ábyrgir fyrir öllum kostnaði sem hlýst af brotum gegn samþykkt nr. 1040/2025.

Eigendur minka-, blindra-, hjálpar-, björgunar- og löggæsluhunda eiga rétt á niðurfellingu gjalda enda leggi þeir fram skilríki um að hundarnir séu notaðir í þeim tilgangi. Þeir eru hins vegar skráningarskyldir og þarf að greiða af þeim skráningargjald.

Eigandi hunds sem sótt hefur hlýðninámskeið hjá viðurkenndum hundaþjálfara getur sótt um 25% afslátt af árgjaldi gegn framvísun gagna um námið.

Eigandi kattar getur sótt um 25% afslátt af árgjaldi gegn staðfestingu þess að kötturinn hafi farið í ófrjósemisaðgerð.

Annað

Dalabyggð er heimilt að afturkalla skráningu hunda eða katta ef vanhöld verða á ormahreinsun, greiðslu skráningar- eða árgjalda sem og ef eigandi hunds eða kattar hefur brotið gegn samþykkt þessari.

Lista yfir skráða hunda og ketti má nálgast neðst á þessari síðu: Dýra- og búfjárhald

Við hvetjum gæludýraeigendur í Dalabyggð til að kynna sér innihald samþykktar og gjaldskrár hér:

SAMÞYKKT um hunda- og kattahald og annað gæludýrahald í Dalabyggð

GJALDSKRÁ fyrir hunda- og kattahald og annað gæludýrahald í Dalabyggð.

Þessi frétt Skráning hunda og katta og ormahreinsun sást fyrst á Dalabyggð.