Byggingarmál

Hér má finna upplýsingar um byggingarfulltrúa, byggingarleyfi, ferli umsókna, eftirlit og gjaldskrár.

Byggingarfulltrúi

Grettir Örn Ásmundsson er byggingarfulltrúi fyrir Árneshrepp, Dalabyggð, Kaldrananeshrepp, Reykhólasveit og Strandabyggð.

Byggingarfulltrúi er með starfsstöð á skrifstofu Strandabyggðar, en með viðveru á skrifstofu Dalabyggðar alla föstudaga ásamt fyrsta og þriðja miðvikudag í mánuði og á skrifstofu Reykhólahrepps fyrsta fimmtudag í mánuði. Með fyrirvara um veður og færð.

Sími byggingarfulltrúa er 451 3517 (á milli kl. 10 – 14) og netfangið er byggingafulltrui@strandabyggd.is.

Embætti byggingarfulltrúa er starfrækt samkvæmt skipulags- og byggingarlögum nr. 73/1997 og reglugerðum þeim tengdum.

Óheimilt er, samkvæmt skipulags- og byggingarlögum, að grafa grunn, reisa hús, rífa hús, breyta því, burðarkerfi þess, formi, svipmóti eða notkun þess eða gera önnur mannvirki, nema að fengnu leyfi viðkomandi sveitarstjórnar.

Framkvæmdir skulu vera í samræmi við staðfest aðalskipulag og samþykkt deiliskipulag. Byggingarleyfi felur í sér samþykkt aðaluppdrátta og framkvæmdaáforma eða samþykkt á breyttri notkun húss.

Auk útgáfu byggingarleyfa annast embættið yfirferð og samþykkt séruppdrátta, úttektir, samþykkt á byggingarstjórum, skráningu iðnmeistara á verk, fasteignaskráningu, yfirferð eignaskiptayfirlýsinga og gefur umsagnir vegna starfs- og veitingaleyfa.

Þá varðveitir byggingarfulltrúi uppdrætti af húsum í sveitarfélaginu og geta allir fengið ljósrit af þeim gegn hóflegu gjaldi.

Byggingarfulltrúi veitir fúslega faglegar ráðleggingar bæði í viðtals- og símatímum.

Umsóknir um byggingarleyfi

Byggingarfulltrúi tekur á móti umsóknum um byggingarleyfi.
Umsóknareyðublöð eru hér á vefnum, en fást einnig á skrifstofum sveitarfélaganna.
Nú er einnig hægt að skila inn umsókn á vef Húsnæðis- og mannvirkjastofnunar: Byggingarleyfi

Sækja skal um byggingarleyfi með góðum fyrirvara þar sem umfjöllun um umsóknir getur tekið nokkrar vikur. Óheimilt er að hefja framkvæmdir áður en byggingarleyfi hefur verið gefið út.

Ferill umsókna

Byggingarfulltrúi yfirfer umsóknir og leggur fyrir þær nefndir sem fara með skipulags- og byggingarmál í hverju sveitarfélagi. Þær fjalla um umsóknir og álykta um úrlausn.
Þaðan fara umsóknir til sveitarstjórna sem hefur formlegt ákvörðunarvald um leyfisveitingarnar.

Eftirlit

Byggingarfulltrúa ber að hafa eftirlit með því að byggt sé í samræmi við gildandi skipulag og samkvæmt skipulags- og byggingarlögum nr. 73/1997.
Byggingarfulltrúi annast úttektir og eftirlit með byggingarframkvæmdum og að farið sé eftir byggingarreglugerð og sér um lóðaskráningu og skráningu fasteignamats samkvæmt byggingarreglugerð nr. 441/1998.

Gjaldskrár

Sveitarfélögin innheimta þjónustugjöld samkvæmt gjaldskrám fyrir byggingarleyfum, útmælingu, eftirliti, úttektum og vottorðum sem byggingarfulltrúi lætur í té.
Byggingarleyfisgjald er ekki endurgreitt þó að byggingarleyfi falli úr gildi af einhverjum ástæðum. Gjöldunum fylgir lögveð í viðkomandi fasteign.

Ítarefni

  • Var efni síðunnar hjálplegt?
  • JáNei