Árið 2024 auglýsti Dalabyggð eftir tillögum að frumhönnun á aðkomutákni sem bjóða myndi fólk velkomið í Búðardal. Um væri að ræða verk sem staðsett yrði við innkomu í þorpið en eftir var að velja endanlega staðsetningu þegar þarna var. Tilgangur með því að auglýsa eftir hönnun var að fá fram tillögu að verki sem best væri fallin til framkvæmdar. Það var samstarfshópur Dalabyggðar, Vegagerðarinnar og SSV sem fór með umsjón verkefnisins.
Þau sem hygðust senda inn tillögu voru beðin um að hafa eftirfarandi í huga:
- Senda skal inn tillögu að hönnun ásamt útskýringu á verkinu og hvaða tengingu það hafi við sveitarfélagið.
- Um er að ræða frumhönnun, því fullhönnun þarf að fara fram í samráði við hagaðila þ.e. Dalabyggð og Vegagerðina út frá verklagsreglum þeirra, gildandi skipulagi, lögum og reglugerðum.
- Verkið þarf að þola íslenskt veður, vera endingargott og raunhæft í framkvæmd. Ekki er gerð krafa um úr hvaða efni verkið er eða framsetningu að öðru leyti s.s. hvort það sé í formi skiltis, frístandandi verk eða framsett með öðrum hætti en hönnuður þarf að rökstyðja val sitt á efni og framsetningu.
- Þóknun er ekki veitt fyrir innsendar tillögur en verðlaun verða veitt fyrir þá tillögu sem verður valin til framkvæmdar, verðlaun eru í formi gjafabréfa að andvirði 300.000.
- Starfshópurinn fullvinnur verkið með höfundi en Dalabyggð kostar fullvinnslu verksins og eignast verkið að því loknu. Dalabyggð hefur rétt til þess að nota heildarniðurstöður verkefnisins við frekari vinnu. Sæmdarréttur helst sbr. 4. gr. Höfundalaga en gerður verður samningur milli höfundar og Dalabyggðar.
- Sögu verksins, tilurð og tengingu við sveitarfélagið verður komið á framfæri á heimasíðu Dalabyggðar ásamt mynd af verkinu.
Á hátíðarhöldunum 17. júní 2024 var tilkynnt um nýtt aðkomutákn við Búðardal. Formaður menningarmálanefndar Dalabyggðar, Þorgrímur Einar Guðbjartsson, kynnti verkið og upplýsti um höfund þess að því loknu.
Það er Svavar Garðarsson íbúi í Búðardal, ættaður frá Hríshóli í Reykhólasveit, sem hannaði aðkomutáknið og fer vel á því því þáttur Svavars í því að fegra umhverfið í Búðardal í gegnum árin er ómetanlegur.
Í kjölfarið fór höfundurinn í vinnu í samráði við sveitarfélagið við að finna aðila til að vinna verkið, finna því stað og aðra „praktiska“ þætti sem klára þurfti. Allt tók þetta tíma og einnig komu upp á verktíma aðrir þættir sem töfðu hver með sínum hætti uppsetningu verksins en nú er það komið á sinn stað og verður sýnilegt öllum þeim sem um þjóðveg 60 aka rétt sunnan við þéttbýlið í Búðardal á komandi tímum. Sveinn Ragnarsson frá Svarfhóli í Geiradal sá um smíði verksins samkvæmt forskrift frá hönnuði þess og Ari Jóhannesson á heiðurinn að steinhleðslu undir verkinu.
Hér á myndinni má sjá þá Svein, Viðar Þór og Gunnbjörn sem unnu við uppsetningu aðkomutáknsins fyrr í dag. Unnið verður að lokfrágangi þess og umhverfisins á næstu dögum.
Hér á eftir er sá texti sem höfundur skilaði inn til starfshópsins með tillögu sinni að aðkomutákni:
Keðjan sem myndar hring:
Samfélag sem saman stendur af mörgum sterkum hlekkjum, þeir mynda samfellda keðju sem umlykur sveitir og sællega byggð.
Vísar einnig til Gullna söguhringsins og margra viðkomustaða hans sem geyma sterka sögu.
Segl víkingaskipsins er sveigt til vesturs vegna vindsins sem stefnir því til Ameríku:
Seglið er eftirlíking af opinni bók, líkt og seglið bar víkingaskipið til Ameríku og fleiri staða þá ber bókin söguna um allan heim. Kápa bókarinnar er minning um sagnaritarann Sturlu Þórðarson frá Staðarhóli, sögusvið Íslendingasagna í Dölunum og Árna Magnússon handritasafnara fæddur á Kvennabrekku. Blaðsíðurnar í bókinni eru til minningar um ljóðskáld áður búsett hér eða sem hafa komið okkur á kortið.
Skáldin eru í stafrófsröð:
Björn Stefán Guðmundsson frá Reynikeldu
Hallgrímur Jónsson frá Ljárskógum
Jóhannes úr Kötlum
Jón Jónsson frá Ljárskógum
Stefán frá Hvítadal
Steinn Steinarr frá Miklagarði
Theodóra Thoroddsen fædd á Kvennabrekku
Þorsteinn Eggertsson textahöfundur
Víkingaskipið og ásýnd þess í heild:
Með víkingaskipinu er verið að minnast afreks Leifs Eiríkssonar frá því um árið 1000 þegar hann sigldi vestur um haf og fann það land sem hann nefndi Vínland. Aftur kemur hringlaga keðjan við sögu og táknar í því samhengi sterkan vilja og stóran sjóndeildarhring Leifs þegar hann leggur upp í þennan leiðangur.
Stallur undir víkingaskipið:
Víkingaskipið þarf að vera á stalli sem ber handbragð þess tíma, ytra útlit þarf að vera grjóthleðsla.
Efnisval:
Gert er ráð fyrir því að allt efni sé úr stáli og verði ryðgað á að líta, þó kemur til greina að blaðsíðurnar í bókinni verði úr þunnu reimargúmmíi.