Svokölluð kjördæmavika stendur nú yfir, en slíkar vikur eru haldnar svo þingmenn og ráðherrar geti farið um kjördæmi sín og hitt þar sveitarstjórnir, heimsótt fyrirtæki og kjósendur. Á meðan kjördæmavika gengur yfir eru engin þingfundir á Alþingi, næsti þingfundur er á dagskrá 3. mars. Þessir dagar eru hverjum þingmanni, landshluta og sveitarfélagið mikilvægir.
Þingflokkur Viðreisnar er á ferð um Norðvesturkjördæmi þessa kjördæmaviku og gerðu sér heimsókn í Dalabyggð í gær, þriðjudaginn 25. febrúar.
Heimsóknin hófst á innliti í MS þar sem framleiðsla og starfsemi voru kynnt, þá var farið á starfsstöð Vegagerðarinnar í Búðardal þar sem ástand vega í sveitarfélaginu var m.a. til umræðu. Að því loknu var tekið stutt innlit í Nýsköpunarsetur Dalabyggðar og farið yfir núverandi og tilvonandi uppbyggingu í Búðardal, s.s. íþróttamannvirki og atvinnuhúsnæði. Að því loknu var haldið inn í Hörðudal þar sem þingflokkurinn fundaði með sveitarstjórnarfulltrúum í Dalahyttum áður en þau héldu áfram för sinni um Skógarstrandarveg út á Snæfellsnes.
Þingflokkur Viðreisnar og starfsfólk í heimsókn hjá starfsstöð Vegagerðarinnar í Búðardal
Það var því tæpt á ýmsum málum við bæði þingmenn og ráðherra í dag. Staða sveitarfélagsins var rædd m.a. með tilliti til búsetuskilyrða, innviða og atvinnu. DalaAuður var að sjálfsögðu til umræðu, sem og verkefnið „Dalabyggð í sókn“ og hvaða áhrif þessi verkefni hafa haft á samfélagið. Þá var góður tími tekinn í umræður um starfsumhverfi landbúnaðarins. Ýmis fleiri mál voru til umræðu s.s. rafmagnsöryggi, fjarskiptamál, starf Óbyggðanefndar og kröfur á starfsemi sveitarfélaga.
Það má með sanni segja að þau hafi fengið góða innsýn í starfsemi og samsetningu sveitarfélagsins Dalabyggðar. Gestirnir fengu einstaklega gott veður í heimsókninni og fóru burtu eftir að hafa snætt lambakjöt úr Dölum, með ýmis mál og tilmæli í farateskinu.
Við þökkum þingflokki Viðreisnar, þingmönnum, ráðherrum og starfsfólki fyrir komuna, samskipti og áheyrn.
Fyrir forvitnissakir kíkti Jón Gnarr inn á Héraðsbókasafn Dalasýslu þar sem hann hitti fyrir Sigríði bókasafnsvörð en þau léku sér saman sem börn í Reykhólasveitinni