Ársþing UDN

Dalabyggð Fréttir

Nítugasta ársþing UDN (Ungmennasamband Dalamanna og Norður-Breiðfirðinga) var haldið 21. mars á Reykhólum.
Aðildarfélög UDN eru ungmennafélögin Afturelding, Dögun, Stjarnan, Ólafur Pái, og Æskan, Glímufélag Dalamanna, Golfklúbburinn í Dölum, auk hestamannafélaganna Glaðs og Kinnskærs.
Sérstakir gestir þingsins voru Helga G. Guðjónsdóttir formaður Ungmennafélags Íslands og Sæmundur Runólfsson framkvæmdastjóri þess.
Finnbogi Harðarson á Sauðafelli var endurkjörinn formaður UDN. Aðrir í aðalstjórn eru Herdís Rósa Reynisdóttir á Efri-Múla, Rebekka Eiríksdóttir á Stað, Eyjólfur Sturlaugsson í Búðardal og Hjalti Viðarsson í Búðardal.
Guðbjört Lóa Þorgrímsdóttir á Erpsstöðum var útnefnd Íþróttamaður UDN árið 2010. Þetta er annað árið í röð sem hún hlýtur titilinn. Annar rétt á eftir var Sturlaugur Eyjólfsson á Brunná.
Á síðasta ári varð Guðbjört Lóa tvöfaldur Íslandsmeistari í glímu, bæði í opnum flokki kvenna og +65 kg flokki, og Landsmótsmeistari í flokki stúlkna 17-18 ára. Þess má geta til viðbótar, að í Bikarglímu Íslands í síðasta mánuði vann Guðbjört Lóa bæði opna flokkinn og +65 kg flokkinn.
Sturlaugur Eyjólfsson varð sjötugur á árinu 2010. Á afmælisdeginum sínum ákvað hann að ganga á 70 fjöll á árinu. Alls gekk hann á 100 fjöll á árinu. Meðal fjalla sem hann gekk á var Hvannadalshnjúkur og 24 tindar í Glerárhringnum á rúmum sólarhring.

www.udn.is

  • Var efni síðunnar hjálplegt?
  • Nei