Tónlistarskóli

Tónlistarskólinn er til húsa í Dalabúð. Þar er boðið upp á fjölbreytilegt tónlistarnám fyrir nemendur á grunnskólaaldri.

Verklagsreglur tónlistarskólans.

Gjaldskrár

Kennsla
Miðað er við að nemendur stundi tónlistarnám sitt á skólatíma í grunnskólanum, það er frá því að skólabílar koma kl. 8.30 og þar til skólabílar fara kl. 15.10.  Til þess að svo megi verða eru nemendur að jafnaði teknir úr kennslustundum í grunnskólanum en einnig er notaðar gæslustundir hjá yngstu nemendum.
Reynt er að haga því þannig að nemendur fara ekki alltaf úr sömu kennslustundum og reynt er að taka tillit til óska nemenda og foreldra.

Grunnnám og miðnám
Í tónlistardeildinni fer fyrst og fremst fram grunnnám samkvæmt aðalnámskrá tónlistarskóla.  Reglulega ljúka þó nokkrir nemendur  grunnnámi og hefja miðnám og er reynt að miða þau skil við 12 ára aldurinn. Engir nemendur stunda framhaldsnám við deildina.

Hljóðfæri sem kennt er á
Tónlistardeildin er lítil og því er fjöldi þeirra hljóðfæra sem kennt er á takmarkaður við þá fjölhæfni sem kennarar deildarinnar búa yfir.
Kennt er á eftirfarandi hljóðfæri:  Píanó, orgel, hljómborð, trommur, gítar, rafgítar, bassagítar, harmoniku, fiðlu, selló, blokkflautur, þverflautu og klarinett.  Þá er kenndur söngur.
Nemendur í tónlistarnámi geta fengið leigð hljóðfæri hjá skólanum.  Leigan er krónur 5000 – á önn. Skrifað er undir leigusamning þegar hljóðfæri er tekið á leigu.  Ætlast er til að nemendur skili hljóðfærum yfir sumartímann.
Í fornámi nemenda er kennt á blokkflautur og er það hljóðfæranám án nokkurs kostnaðar fyrir foreldra.

Einstaklingstímar og hópatímar
Þegar verið er að kenna á hljóðfæri er um einstaklingskennslu að ræða og þá er boðið upp á hálft eða heilt nám.   Hálft nám er 30 mínútur á viku og heilt 60 mínútur á viku.  Hægt er að vera eingöngu í hópatíma, t.d. sönghóp eða hljómsveit.  Tónfræðin er kennd í þremur aldrushópum 30 mínútur á viku.
Þessu til viðbótar er svo samspil nemenda reglulega.

  • Var efni síðunnar hjálplegt?
  • Nei