Sveitarstjórn Dalabyggðar hefur afgreitt fjárhagsáætlun í fyrri umræðu. Var það gert á 262. fundi sveitarstjórnar þann 13. nóvember sl.
Samkvæmt samþykkt um stjórn Dalabyggðar skal sveitarstjórn á hverju ári afgreiða fjárhagsáætlun fyrir komandi ár og næstu þrjú ár þar á eftir. Byggðarráð leggur samkvæmt sveitarstjórnarlögum tillögu um fjárhagsáætlun fyrir sveitarstjórn eigi síðar en 1. nóvember ár hvert. Sveitarstjórn skal fjalla um hana á tveimur fundum sem fram skulu fara með minnst tveggja vikna millibili.
Á milli umræða vill Dalabyggð eiga samtal við íbúa, kynna áætlunina og forsendur hennar.
Því verða haldnir þrír opnir fundir í Nýsköpunarsetrinu að Miðbraut 11 í Búðardal, til kynningar á fjárhagsáætlun Dalabyggðar 2026-2029.
Fyrirkomulag þetta er með von um að sem flestir íbúar sjái sér fært um að mæta, kynna sér forsendur áætlunarinnar og taka þátt í umræðum.
Fundirnir verða allir þriðjudaginn 2. desember 2025:
- Fyrsti fundur kl. 12:00 – 13:00
- Annar fundur kl. 17:00 – 18:00
- Þriðji fundur kl. 20:00 – 21:00
Dagskrá allra funda er sú sama:
- Fjárhagsáætlun Dalabyggðar 2026 – 2029
Heitt á könnunni og íbúar hvattir til að mæta.
Fjárhagsáætlun Dalabyggðar fyrir árin 2026 til 2029 var afgreidd frá fyrri umræðu í sveitastjórn Dalabyggðar eins og fyrr segir þann 13. nóvember sl. Miðað er við að útsvarsprósenta verði áfram 14,97% og álagningarhlutfall fasteignaskatts verði óbreytt á milli ára.
Á árinu 2026 er gert ráð fyrir rekstrarafgangi af samstæðunni (A og B hluta) að fjárhæð 8,5 m.kr., veltufé frá rekstri verði 145 m.kr. og veltufjárhlutfallið verði 1,18, skuldaviðmið er áætlað að verði 118,1% á árinu 2026 og fari svo lækkandi á árunum þar á eftir, framlegð er áætluð að verði 13,4% á árinu 2026. Þessar tölur eru í takt við þær áætlanir sem gerðar voru í aðdraganda þess að farið var í framkvæmdir við íþróttamannvirki í Búðardal sem er stærsta einstaka framkvæmd Dalabyggðar frá upphafi.
Áætlað er að varið verði í framkvæmdir á árinu 2026 alls 229 m.kr og þar af fari 170 m.kr. í frágang á Íþróttamannvirkjum í Búðardal sem tekin verða í notkun í febrúar 2026.
Seinni umræða um fjárhagsáætlun Dalabyggðar fyrir árin 2026 til 2029 fer fram þann 11. desember n.k. en í aðdraganda þess fundar verður fjárhagsáætlunin kynnt á fundunum sem nefndir eru hér ofar.